विदेशीको इसारामा सरकार बनाउने खेल

रुकुम, शान्ति तथा पुनर्निर्माण मन्त्री जनार्दन शर्माले विदेशी शक्तिको निर्देशनमा सरकार बनाउने खेल भइरहेको बताएका छन् ।
निर्माणाधीन धाउनेबगर- जामाबगर सडक अनुगमनमा आइतबार रुकुम पुगेका मन्त्री शर्माले विजय घले स्मृति रनिङ शिल्डमा सहभागी खेलाडीलाई सम्बोधन गर्दै भने, 'हामी जनताको सर्वोच्चताका लागि जनतासँगै रहेर आन्दोलन गर्न तयार छौं ।' उनले अब माओवादीले सडक र सदनबाट एकैसाथ नागरिक सर्वोच्चताका लागि आन्दोलन गर्ने बताए । नागरिक सर्वोच्चता कायम नभएसम्म कोही प्रधानमन्त्री बन्छ भने त्यो विदेशीको मुख्य मन्त्रीमात्र हुने बताए । शर्माले थपे, 'हामी सधैं जनताको आदेशअनुसार काम गर्छौं ।'

नागरिक सर्वोच्चता कायम गर्न राष्ट्रपतिले गरेको असंवैधानिक कदम फिर्ता लिनुपर्ने र त्यो नभएसम्म माओवादीले संसदको गतिविधि पनि अगाडि बढ्न नदिने शर्माले बताए ।

माओवादी पोलिटब्युरो सदस्यसमेत रहेका मन्त्री शर्माले कुनै पनि वैदेशिक शक्तिको हस्तक्षेपमा आफ्नो पार्टी नझुक्ने बताए । 'देश युवाको हातमा छ,' मन्त्री शर्माले भने, 'देश परिवर्तनका लागि आइपर्ने जस्तोसुकै परिस्थितिमा पनि युवाको साथ आवश्यक छ ।'